2011 Rhif 1864 (Cy. 202)

TAI, CYMRU

Rheoliadau Tai (Benthyciadau Ffioedd Gwasanaeth) (Diwygio) (Cymru) 2011

NODYN ESBONIADOL

(Nid yw’r nodyn hwn yn rhan o’r Gorchymyn)

 

Mae'r Rheoliadau hyn yn diwygio Rheoliadau Tai (Benthyciadau Ffioedd Gwasanaeth) 1992 (“Rheoliadau 1992”) sy'n darparu bod awdurdodau tai yn cael gwneud benthyciadau i'w tenantiaid mewn cysylltiad â ffioedd gwasanaeth am atgyweiriadau neu welliannau. Mae'r diwygiadau sy'n gymwys o ran Cymru'n unig, yn ymwneud â benthyciadau sy'n cael eu gwneud o dan y pŵer disgresiynol yn rheoliad 5 o Reoliadau 1992. Caiff y pŵer hwnnw ei arfer, mewn cysylltiad â fflatiau, gan “awdurdodau tai”. Mae'r term Saesneg “housing authority”, sy'n cyfateb i’r term Cymraeg “awdurdod tai” at ddibenion y diwygiadau hyn, wedi ei ddiffinio yn adran 450B(4) o Ddeddf Tai 1985. 

Mae rheoliad 2 yn disodli rheoliad 6(2) o Reoliadau 1992 i ddarparu bod benthyciad sy'n cael ei wneud o dan y pŵer yn rheoliad 5 yn cael bod ar delerau nad ydynt yn ei gwneud yn ofynnol bod llog yn cael ei dalu neu sy'n ei gwneud yn ofynnol bod llog yn cael ei dalu ar ran yn unig o'r benthyciad.

Mae rheoliad 3 yn diwygio paragraff 1 o Atodlen 2 i Reoliadau 1992 o ganlyniad i'r rheoliad 6(2) newydd.

 

2011 Rhif 1864 (Cy. 202)

TAI, CYMRU

Rheoliadau Tai (Benthyciadau Ffioedd Gwasanaeth) (Diwygio) (Cymru) 2011

Gwnaed                           26 Gorffennaf 2011

Gosodwyd gerbron Cynulliad Cenedlaethol Cymru       27 Gorffennaf 2011

Yn dod i rym                             19 Awst 2011

Mae Gweinidogion Cymru, drwy arfer y pwerau a roddwyd i'r Ysgrifennydd Gwladol gan adrannau 450B a 450C o Ddeddf Tai 1985([1]), ac a freiniwyd bellach ynddynt hwy([2]), yn gwneud y Rheoliadau a ganlyn:

Enwi, cychwyn, cymhwyso a dehongli

1.—(1)(1) Enw'r Rheoliadau hyn yw Rheoliadau Tai (Benthyciadau Ffioedd Gwasanaeth) (Diwygio) (Cymru) 2011 a deuant i rym ar 19 Awst 2011.

(2) Mae'r Rheoliadau hyn yn gymwys o ran Cymru.

(3) Yn y Rheoliadau hyn ystyr “Rheoliadau 1992” (“the 1992 Regulations”) yw Rheoliadau Tai (Benthyciadau Ffioedd Gwasanaeth)  1992([3]).

Telerau benthyca

2. Mae Rheoliadau 1992 wedi eu diwygio drwy roi'r canlynol yn lle paragraff (2) o reoliad 6 (telerau benthyca)—

“(2) A loan made by virtue of regulation 5 may be made on terms that—

(a) do not require the payment of interest; or

(b) require the payment of interest only on part of the loan;

and, shall otherwise, subject to paragraph (3), be on such terms as the lender may determine.”.

Cyfradd y llog

3. Mae Rheoliadau 1992 wedi eu diwygio, ym mharagraff 1 o Atodlen 2, drwy fewnosod ar ôl y gair “loan” y geiriau “or the part of it on which interest is payable”.

 

 

 

Huw Lewis

 

 

Y Gweinidog Tai, Adfywio a Threftadaeth, un o Weinidogion Cymru

 

26 Gorffennaf 2011